114 අවුරුදු උත්සවයක ආතල් සිද්දි!

හැම ගමකම වගේ අපේ ගමෙත් තිබ්බනේ මේ සැරේ අවුරුද්දට සුර්ය මංගල්‍යක්!.අර කලින් පෝස්ට් එකේ කිව්ව ෆයර් බෝයිස්ලම තමයි මේකත් කරේ!

පොඩි කොල්ලෝ ටිකක් ආධාර එකතු කරලා ලොකු අවුරුදු උත්සවයක් තියලා රෑ DJ එකකුත් තිබ්බා!.පටන් ගත්ත වෙලේ ඉඳන්ම ඉතින් ෆන් තමයි මොකෝ හැමදාම නැහැනේ!.

අවුරුදු උත්සවය තියෙන දවසේ අපේ අම්මා එයාගේ යාලුවෙක්ටත් අපේ ගෙදර එන්න කිව්වා.අවුරුදු උත්සවෙත් බලලා දවල් කෑම අපේ ගෙදරින්.එයා එනවා කිව්වේ එයාගේ අවුරුදු දාහතක දුවත් එක්ක!.ඒ නංගිව පොඩි කාලේ දැක්කට පස්සේ දැක්කෙම නැහැ මම,එයත් එනවා කිව්ව නිසා මම ටිකක් අපහසුතාවයෙන් හිටියේ ටිකක් ලැජ්ජාවෙන් වගේ,මොකද මම ඉතින් ලැජ්ජ බයට හැදුන කොල්ලනේ!. නේ..ද...?


ඒ වගේම ටිකක් ආසවෙනුත් හිටියේ ඉතින් ඒ නංගිව දැකගන්න දැන් කොයි වගේද කියලා.(සහෝදර ආසාවක් ඈ ඒ!).ඔන්න එයාලත් උදේම ආවා!අනේ ඒ නංගි පොඩිත්තට නිකන්ම වයස ගෙවිලද කොහෙද!.වැඩිය කතා බහක් නැහැ මා එක්කනම් ඒත් අම්මා එක්ක නම් හිනා වේවි කතා කරා!,ඉස්සර දත් ටිකෙත් මොකක්ද ලෙඩකට බෙහෙත් ගන්න නිසා කහට බැඳිලා.හරියට අවුරුදු 13ක ළමයෙක් වගේ හැසිරුනේ!

අවුරුදු උත්සවේ තියෙන තැනට අම්මා එයාලව එක්කන් එන්නම් කිව්ව නිසා මම උදෙන්ම ගියා අවුරුදු උත්සවේට!මුලින්ම තිබ්බේ ගම හරහා මැරතන් එක!.මැරතන් තියා මීටර් සීයක්වත් ලඟදි නම් දිව්වේ නැහැ ඉතින් මේකට දුවනවද නැද්ද කියලා දෙගිඩියාවෙන් හිටියේ.ටිකක් ලොකු වටයක් දුවන්න තිබ්බෙත් හැබැයි ඉතින් තෑග්ග නම් බර වටින එකක්!

තෑග්ග ගැන හිතලා දුවන්න හිතුවේ ඒත් කොහෙන්ද මන්දා දුවන සෙට් එකක් හදිසියේම මැරතන් එකට බැස්සා!.උන් ප්‍රොෆෙසනල් දුවන සෙට් එකක්.ඒ කියන්නේ කොහේ හරි  අවුරුදු උත්සවයක් තියනකම් බලන් ඉන්නේ දුවන්න,ඒක තමයි අවුරුදු කාලේට එයාලගේ රස්සාව!ඉතින් මුන් එක්ක දුවලා නිකන් චාටර් වෙන්න ඕන නැති නිසා දිව්වේ නැහැ.මැරතන් එක ගියාට පස්සේ ඔන්න කොට්ට පොර ගැහුවා,

කියන්න සතුටුයි පින්වතුනි මම කොට්ට පොර ගහලා තුන!.මම වට තුනක් ගහලා දෙකක් දින්නා අන්තිම එක ප්‍රතිවාදියා මට ගහලා තමා ෆයිනල් ගියේ.ඒකෙනුත් මම දින්නා නම් මම තමා ෆයිනල් යන්නේ.අනේ ඉතින් මේ කොට්ටේ උස්සගන්නත් බැරිව හිටපු එකේ ඔය මදැයි කියලා හිත හදාගෙන සන්තෝෂෙන් හිටියා.හැබැයි දුක කියන්නේ මට ගහලා ෆයිනල් ගියේ මගේ හතුරෙක්,ඌට අවුරුදු 15යි ඒ වුනාට ගංජා ගහන හොර පොල් කඩන ගෑනු නානවා හොරෙන් බලන මහා නැහැදිච්ච නොසන්ඩාලයෙක්.


ඒ වුනාට ෆයිනල් එකෙන් ඌ පරාදයි මොකද එහා පැත්තේ හිටියේ වේලු සුමන වගේ යෝද සයිස් එකෙක්,මම ෆයිනල් ගියත් උගෙන් කාලා ඩවුන් වෙනවා!.ඔන්න ඊට පස්සේ අම්මා අර අම්මගේ යාළුවායි එයාගේ දූ සිඟිත්තයි එක්කන් ආවා,ඊට පස්සේ මම සහභාගී වුනා සංගීත තොප්පි තරඟෙට,එකේදී කට්ටිය සීයක් විතර හිටියා,තරඟෙ පටන් අරන් මට ආපු තොප්පියමම මගේ එහා පැත්තේ හිටිය එකාට දාලා ඕක වටයක් ගිහින් එනකම් වෙලා තියෙනවනේ කියලා යාලුවෙක් එක්ක කයියක් ගගහා හිටියා මෙන්න එක පාරට කොහෙන්ද ම්නදා තොප්පියක් ආවා.මම සුටුස් ගාලා ඒක මගේ එහා පැත්තේ හිටිය එකාට දැම්මා එවෙලේම මියුසික් ඕෆ් වුනා,අනේ ඉතින් අර බුවා මට බැන බැන යනවා මම කයිය ගගහා හිටිය නිසා ඌත් සැලකිලිමත් වුනේ නැහැ කියලා.බලද්දි කට්ටිය වැඩි නිසා මේකෙදි තොප්පි තුනක් වටේ යනවා.

කොහොම හරි අරූ මට ශාප කර කර හැඩු කඳුලෙන් සමුගත්ත නිසා මාත් ඉක්මනට කුජීත ලෙස දැවීගියා!.ඊට පස්සේ බිත්තර පාස් කරන මෙව්වා එක.

එකේදී අපේ ගමේ නංගිලා කීප දෙනෙක්ම මා එක්ක බිත්තර මේව්වා කරන්න කැමැත්තෙන් හිටියේ ඒත් මම අම්මා ඉන්න හින්දා අම්මා ගාවට ගිහින් අඩගැහුවා,අමං දන්නවා ඉතින් අම්මා ඕකට කීයටවත් එන්නේ නැහැ කියලා.ඒකයි කතා කරෙත් මොකද බැහැ කිව්වට පස්සේ මට ඕන කෙනෙක් එක්ක ඕවා පාස් කෙරුවහැකිනේ!ඒත් පින්වතුනි මම තරම් පව්කාරයෙක් ලොවෙත් නැතුව ඇති.බලාපොරොත්තු වුනා වගේම අම්මා බැහැ කිව්වා හැබැයි අර අම්මගේ යාළුවා,නැන්දාව එක්කන් යන්න කිව්වා.අනේ ඒ නැන්දගෙන් ඇහුවා ඉතින් අම්මගේ කීමට වෙලාවට එයා බැහැයි කිව්වා.අම්මාගේ ෆුල් දහිරිය දැන් එයාව මා එක්ක බිත්තර පාස් කරවන්න එවන්න.අම්මා අනේ අනේ කියනවා නැන්දා බැහැ බැහැ කියනවා!

අන්තිමට නැන්දා එයාගේ දුවව මගේ පිටේ පැටෙව්වා.

"මේ ඉන්නේ නංගි! මෙයාව එක්කන් යන්න පුතේ! මෙයා ඔය වගේ ඒවාට වැඩිය ඉදිරිපත් වෙලාම නැහැ"
අනේ ඉතින් නංගි ලැජ්ජාවෙන් ඇඹරි ඇඹරි බැහැ බැහැ කියද්දී නැන්දාගේ දැඩි බලකිරීම මත එයා මා එක්ක ආවා :'(

මම කඩේකින් බිත්තරයකුත් ගෙනල්ලා රෙඩි පිට හිටියේ.මුලින්ම ගැහැණු පිරිම දෙපැත්තට දාලා බිත්තර ටික කලවම් කරලා ඉස්සෙල්ලම ගැහැණු පාර්ශවයට දුන්නා.සංවිධායක මඩුල්ලේ එකෙක් විසිල් එක ගැහුව ගමන් බිත්තරේ පාස් කරන්න කිව්වා.

එකා....යි දෙකා...යි තුනා...යි කියලා එකෙක් විසිල් එකක් ගැහුවා.බවලත්තු ටික බිත්තර සින් සින් ගාලා එවනවා.සමහරු තමන්ගේ පාට්නර් එක්ක තියෙන පෞද්ගලික තරහවල් වලට බිත්තර හරියට ඔලුවටම එව්ව අවස්ථාත් තිබ්බා.මගේ පාට්නර් හෙනම ලතා ස්ටයිල් එකකින් බල්ලන්ට ආප්ප දානවා වගේ බිත්තරේ දැම්මේ නැතැ හිමින්.

චොකොස්..

අඩි දහයක් විතර ඈතින් මගේ ඉස්සරහට වැටුනා බිත්තරේ! අපේ ගෙවල් පැත්තේ නංගිලාට හෙනම චූන් දැන් ඕකෙන්.කින්ඩි ගොඩයි මම ශේප් එකේ එතනින් ඉවත් වෙලා සිරි මාමලගේ කඩේට ගියා.සිරි මාමා කියනවා

"ඒ දැරිවිව මොන මොන්ටිසෝරියෙන්ද බන් කුදලන් ආවේ?"

"අනේ මාමේ මේ!හුයන්නක් කතා නොකර මට සූප්පුවක් දෙනවද ඒ නංගිට දෙන්න?"

සිරි මාමා
"හොහ් හොහ් හො ඔව්වා ඔහොම තමා බොල ට්‍රේනින් කරලා ගනින්"

සිරි මාමා මගේ හෙන ෆිට් එක,සිරි මාමගේ කඩේ දාම් බෝඩ් එකේ සිරි මාමයි මමයි පැය ගණන් දාම් ඇදිල්ලෙන් ෆිට් වුනු තරම නිසා තමා ඔය උඩ දෙබස ගියේ!

වෙලාවට අම්මත් අර නංගිට කියනවා
"හරියට පාස් කරන්න එපැයි පුතේ බලන්නකෝ ඔය මගට නේ දැම්මේ!"

කවදා බිත්තර පාස් කරපු ඈයෝද ඉතින් කමක් නැහැ.ඊළඟට තිබ්බේ කපල් බැලුන් ඩාන්ස් එක.එකේදී අම්මව එක්කන් ආවා කොහොම හරි අපි නටමු කියලා.කොහෙද අම්මා කොටයි මට වඩා ඉතින් මගේ කොන්දේ රුදාව හැදෙයි කියලා අම්මා අර නැන්දව එව්වා කෝම හරි.

දැන් කපල් කපල් බැලුන් නළලට හිර වෙන්න තියාගෙන නටනවා.

වෝනා බී චම්මක් චලෝ!

නටන්න බැරි කුජීත සින්දුවක් දාලා සංවිධානය කරන උන් ලඟට ඇවිත් කෑගහනවා ඔහොම බැහැ නටන්න
ඕන කියලා.හරියන්නේ නැහැ බැලුම නැන්දගේ නල්ලට හිර කරලා දික් කරා පස්ස.පස්ස වන වන හිටිය පැය කාලක් විතර වෙලාවට අපේ ගමේ කොලු බාප්පල නැහැ නැත්තන් ඉතින් අයියෝ පශ්චාත් බාගේ මගේ









ටික වෙලාවකින් බැලුම රුවිතෙට ගියා දැන් බැලුම මගේ කම්මුලේ නැන්දගේ කට හරියේ! බැලුම පිපිරුවොත් එහෙම නැන්දගෙන් නොමිලේ කිස් එකක් හම්බවෙනවා!.මේක මෙහෙම වැඩි වෙලාවක් කරන්න බැහැයි කියලා හිතුන නිසා අන්තිමේ මම ගේම අතෑරියා!.

ඊට පස්සේ හැන්ද මත දෙහි ගෙඩිය අරන් ගියා,ගෝනි පැන්නා,ටෙනිස් බෝලෙන් ටින් කැඩුවා,එක ගිනි කූරෙන් වැඩිම ඉටි පන්දම පත්තු කරා,මීටර් සීය දිව්වා,සංගීත පුටු තරඟෙට සහභාගී වුනා දුක තමයි ඇසිලින් එකකින්වත් දින්නේ නැහැ හැම එකෙන්ම පරාදයි!

ඒ වුනාට හොඳ ෆන් එකක් ගත්තා තව කතා ගොඩක් තියෙනවා ඕවයේ රස බර ඒත් ලිපිය දික් වෙන නිසා ඔය ටික ඇතියි කියලා හිතෙනවා.මෙච්චර අතපය හොඳට තිබිලත් එක තෑග්ගක් වත් ගන්න බැරි වුනා ඒත් අපේ අම්මා සංගීත පුටු තරඟයෙන් දිනලා තෑග්ගක් ගත්තා :) අර නංගි නම් මෙලෝ රහක් නැහැ අෆොයි.ජම්බු ගහෙනුත් වැටිළලු ඒත් කවදා කෙල්ලෙක් වෙයිද මන්දා.