116 මං එදා ඇඳ යට බන් හිටියේ!!

මට මේ දවස් වල හරියට ගමන් බිමන්,එක එක වැඩ,මල ගෙවල් සෙට් වෙනවා.මේවා නිසා පෝස්ට් එකක් දෙකක් හරි හම්බුනානේ කියලා හිත හදාගත්තා.එහෙම හම්බ වුනු කතා දෙක තුනක් තමා අද ලියන්නේ.මේවා ඇත්තටම වෙච්චි ඒවා බොරු කතා නෙවේ.

අපේ ගෙවල් පැත්තේ ඉන්නවා නන්දෙ කියලා මාමා කෙනෙක් මිනිහා හරි කුණා.මෙයාගේ වයිෆ්ට අපි කියන්නේ නන්දෙ නැන්දා කියලා.නැන්දත් නන්දෙ මාමාට දෙවෙනි නැහැ හාල් මැස්සෝ සීයක් උයලා හාල්මැස්සෝ ටික අර ගන්නවා පහුවෙනිදට ගන්ඩ හොද්ද විතරක් කාලා.ඒ ගෙදර දුවලා පුතාලත් එහෙම්මයි.

කොහොම හරි නන්දෙ මාමා මේ ලඟදි හාට් ඇටැක් ඇවිල්ලා නැති වුනා.මල ගෙදර පලවෙනි දවසේ විතරයි සෙනග.ගෙවල් ළඟ නිසා මමනම් නයිට් තුන හතරක්ම ගැහැව්වා.දෙවෙනි දවසේ සෙනග නැහැ රෑ වෙද්දී,හිටියේ බූරුවා ගහන සෙට් එකකුයි ඥාතින්
කට්ටියකුයි විතරයි.

මායි තව යාළුවෙකුයි තමා පලවෙනි දවසෙයි දෙවෙනි දවසෙයි ගියේ.අපි ඉතින් කරේ කැරම් බෝඩ් එක අරන් පොඩි උන්ව පරද්ද පරද්ද හිටියා.ලොකු අය සෙට් වුනාම ඉඳලා හිටලා අපි පරාද වුනා ඉතින්.දෙවෙනි දවසේ යද්දී එක තැනක කස්ටියක් සෙට් වෙලා බූරුවා ගහනවා.පොඩි උනුත් නැහැ තව තැනක කොල්ලෝ දෙන්නෙක් කැරම් ගහනවා.අපි දෙන්නත් එතනට ගිහින් ටිකක් ලඟට වෙන්න වාඩි වෙලා හිටියා ඒ දෙන්නා ගහලා ඉවර වුනාම අපිත් එයාලට එකතු වෙන්න.මේ දෙන්නා ගහනවා ගහනවා ඉවරයක් නැහැ අපි දෙන්නත් බලන් ඉන්නවා මුන් දැන් ඉවර වෙයි දැන් ඉවර වෙයි කියලා.කොහෙද මුන් දෙන්නා අපි ආපු වෙලේ ඉඳන්ම එකම ගේම ගහන්නේ.

මම ටිකක් කිට්ටු කරලා බැලුවා මුන් දෙන්නම ගහන්නේ සුදු ඉත්තෙක්ට අනිත් ඉත්තෝ ඔක්කොම වලවල් වල.මට හිතුනේ මෙයාල පොයින්ට් එකක් ගහනවා කියලා සාමාන්‍යයෙන් දෙන්නෙක් පොයින්ට් ගහන්නේ නැහැනේ..එත් මුන් දෙන්නම සුදු ඉත්තව එහෙට යවනවා මෙහෙට යවනවා කිසි කතාවකුත් නැහැ ඒ වගේම බෝඩ් එක මැද්දට ඔලුව නවාගෙන හරියට ඇලවුන ගස් දෙකක් වගේ.

අපි කතා කරත් ඇහුනේ නැහැ වගේ අර ඉත්තට ගහනවා.පැය බාගේකටත් වැඩිය ගියා.ඔන්න ඔය වෙලාවේදී නන්දෙ මාමගේ පුතා ඔතනින් ගියා.මම එයාට සීන් එක කිව්වම ඌ කියාපි.

උඹලා දෙන්නා මාර ඩයල් දෙකක්නේ.කලින් මගෙන් අහන්න එපැයි, මුන් දෙන්නා හයේ ඉඳන් ඔය ඉත්තට ගගහා ඉන්නේ බන් ටැබා ගහලා.

එවෙලේ 8:30ට විතර ඇති.ඒ කොල්ලෝ දෙන්නා ටැබා කියන මත් වෙන පෙති ජාතියක් ගහලා තමා එහෙම ඉඳලා තියෙන්නේ.පස්සේ බොහොම අමාරුවෙන් උන් දෙන්නව පැත්තකට එක්කන් ගිහින් වාඩි කරවලා තිබ්බා.

දෙවෙනි කතාව වුනේ මම අඳුරන අයියා කෙනෙක්ගේ ගෙයක් හදන්න ගිහින්.මටත් අඩ ගැහුවා අත් උදව්වට!.

අපි ඒ අයියට කියමුකෝ නිලන්ත කියලා නිලන්ත අයියගේ යාලුවෙක් තමා බාස්.මිනිහා බණ්ඩාර.නිලන්ත අයියට වඩා අවුරුදු දහයක් විතර වැඩිමල්.අප කියන්නේ බණ්ඩාර මාමා කියලා.ඔය නිලන්ත අයියගේ අම්මා මැගිලින් ආච්චි බණ්ඩාර මාමා එක්ක ටිකක් තරහයි ඒ වෙන මොකටවත් නෙවේ ඒ කාලේ බංඩාර මාමා නිලන්ත අයියව බොන්න එක්කන් ගිහින් පුරුදු කරා කියලා තමා.

වැඩේ දවසෙත් හවසට අනිවා දෙන්නා බොනවා කියලා දන්න නිසා මැගිලින් ආච්චි වැඩි කැමැත්තකින් නෙවේ හිටියේ දෙන්නා දැනට වුනත් එකතු වෙනවට.නිලන්ත අයියා මම ඉන්න නිසා බඩු ගේන්න එහෙට මෙහෙට ගියා බණ්ඩාර මාමා වැඩ.මම තමයි අත්උදව් කාරය.මට තියෙන්නේ බදාම ටික,ගල් ටික බණ්ඩාර මාමා ලඟට ඇදලා දෙන්න.බණ්ඩාර මාමා ගිනි කසයා වගේ වැඩ.මැගිලින් ආච්චි වැඩ කරන තැනින් එහෙට යනවා මෙහෙට යනවා හොරෙන් බල බල ඒත් වචනයක්වත් කතා නැහැ.

බණ්ඩාර මාමා මට ඇහෙන් පෙන්නනවා මැගිලින් ආච්චිව.ගඩොල් වලින් තමා බිත්තිය බැන්දේ ඉතින් සමහර තැන්වලට ගඩොල් බාග කඩලා තමා බණ්ඩාර මාමා ගත්තේ.එක පාරක් ගඩොල් කඩද්දි මැගිලින් ආච්චි දැකලා බණ්ඩාර මාමට බනින්න ගත්තා.

ඈ බොල තොපිලා බාස්ලද? නිලන්ත ණයට සල්ලි හොයන් ඔය ගඩොල් ගෙනාවේ තෝ මෙතන කිසි වගේ වගක් නැතුව ගඩොල් කඩනවනේ.මම නිලන්තට කිව්වා එක එක මක බාස්ලට වැඩ නොදී හොඳ බාසෙක් හොයා ගන්න කියලා.කොහේද උනුත් අපි කියන ඒවා අහන්නේ නැහැනේ.කඩන්නේ නැහැ එක ගඩොලක් ආයේ!!

මට මැරෙන්න හිනා බණ්ඩාර මාමා තරහෙන් පුපුර පුපුර මටත් රවනවා.පස්සේ නිලන්ත අයියව කෝල් කරලා ගෙන්නන කම් අපිට ගල් කඩන්න තහනම් නිසා පැත්තකට වෙලා වාඩි වෙලා ඉන්න වුනා.

මේක තුන්වෙනි කතාව
මේ කතාව මට තාම හිතාගන්න බැහැ මොකක්ද මේකේ තේරුම කියලා ඒත් මම එවෙලේ සද්ද නැතුව හිටියේ මිනි මැරුමක් තරම් දුරදිග යන්න පුළුවන් ප්‍රශ්නයක් නිසා.

අපේ ගෙවල් කිට්ටුව ඉන්නවා ප්‍රසන්න කියලා අයියා කෙනෙක්.අම්මගේ බිස්නස් වැඩකට මට මිනිහා එක්ක බියගමට යන්න වුනා මිනිහත් එක්ක මිනිහගේ බයික් එකේ.අපි බියගමටත් ගිහින් වැඩෙත් කරන් එද්දී කඩවතදී අපිට හම්බ වුනා ප්‍රසන්න අයියගේ යාලුවෙක් රාජිත කියලා.රාජිත ඉන්නේ ප්‍රසන්න අයියගේ අල්ලපු ගෙදර හැබැයි රාජිත අයියා නේවි එකේ.මාසෙකට දෙහෙකට සැරයක් විතරයි ගෙදර එන්නේ.රාජිත අයියගේ ගෙදර ඉන්නේ එයාගේ වයිෆුයි අම්මයි විතරයි.

අල්ලපු ගෙදර වුනාට මොකද රාජිත අයියට නිවාඩු අඩු නිසා කාලෙකින් දෙන්න හම්බවෙලා නැහැ.මා එක්ක නම් කොහොමත් හිතවත් නැහැ රාජිත අයියා.මේ පාර නිවාඩුවට ගෙදර යන ගමන් තමයි අපිට හම්බ වුනේ.

ඉතින් මේ දෙන්නා ආගිය තොරතුරු කතා කරලා යන්ද ඇහුවා සෙට් වෙන්න.ප්‍රසන්න අයියා මට කිව්වා හදිසියක් නැත්තම්එනවද ඇහුවා.මාත් ඉතින් වෙලා තියෙන හින්දා යන දේවාලෙක යන් කිව්වා.ඊට පස්සේ ඒ හරියේ තියෙන අකුරු දෙකේ රෙස්ටුරන්ට් එහෙකට අපි තුන්දෙනා ගියා.බියර් බෝතල් තුනක් ඇනවුම් කරත් මම බොන්න බැහැයි කිව්වම දෙකක් ගෙනල්ලා දෙන්නා දැන් පරණ කතා අලුත් කතා,අම්බානක කතා.

මම කෝක් මෙගා එකක් ගෙනත් අරුන් දෙන්නගේ බයිට් වලට වැඩේ දුන්නා.රාජිත අයියාහෙන මොරාල් පොර.යාලුවට සෙකන්ඩ් නොවෙන්න වග බලාගෙන ඕඩර් කරෙත් ඒ රෙස්ටුරන්ට් එකේ ගණන් වැඩිම කෑම බීම.බියර් බෝතල් දෙක හතරක් වුනා ඒ දෙක ඉවර වෙලා තවත් දෙකක් ගෙනාව.ඉස්සෝ ඩෙවල් ප්ලේට් හතරකට විතර මම වග කිව්වා.

දැන් හයවෙනි බෝතලේත් ටේබල් එක උඩ,දෙන්නට දැන්නම් වෙරි මේ අතරේ රාජිත අයියා ෆෝම් වෙලා බ්‍රැන්ඩි බාගෙකුත් ඕඩර් කරා.මට හිතුන දැන්නම් එන පොට හරියන්නේ නැහැ වගේ කියලා.ඉතින් මම ප්‍රසන්නයට කිව්වා දැන් ගියොත් හොඳයි කියලා කොහෙද මේ යකා කියනවා

අනේ මල්ලි තව ටිකකින් යන් ආයේ කවදා මුන්ව හම්බ වෙයිද දන්නේ නැහැනේ??.

මම ඉතින් තණකොළ උගුරේ හිරවුණු ගොනා වගේ දැන් ගැලවෙන්න බැරුව මුන් දෙන්නා දිහා බලන් ඉන්නවා.බ්‍රැන්ඩි බාගෙන් බාගෙකුත් ඉවර වේගෙන එන්නේ.දැන් රාජිතය අඬනවා.

මචන් මට හෙන අප්සට් බන්.මේ ලඟදි දවසක මම අපේ ලොක්කෙක්ගේ වැඩකට එලියට ආවා ඒ ගමන් මම වැලිසර කෑම්ප් එකට ඇවිත් යාලුවෙක්ගෙ බයික් එකකුත් ඉල්ලන් රෑගෙදර ආවා.එවෙලේ අපේ දිනූශා(රාජිත අයියගේ පවුල) හරියට කලබල වුනා මාව දැකලා.පව් බන් එකී(අඬමින්) එකී හිතන්න ඇති මම ඒකිව සැක කරන නිසා එවෙලේ හදිසියේ නොකියම ගෙදර ආවා කියලා.

දැන් තමයි හොඳම හරිය මම අර උඩ කිව්වේ මට හිතාගන්න බැහැයි කියපු කතාව.

අඬන රාජිත දිහා බලන් හිටපු ප්‍රසන්න අයියා
ඔව් බන් මම එදා ඇඳ යට හිටියේ!!

රාජිතට වචනේ මීටර් වුනේ නැහැ තවත් මොනවද මන්දා කියව කියව හිටියා.හොඳ සිහියෙන් හිටපු මට මේ කතාව තාම හිතාගන්න බැහැ ප්‍රසන්නයා කිව්වේ මොන ඇඳ ගැනද කියලා.මම සද්ද නැතුව හිටියා.මොකෝ ඕක විහිලුවට හරි ඇදලා අරුන් දෙන්නා මරාගත්තොත් අන්තිමට මටත් සාක්කි දෙන්න පොලිසි ගානේ යන්න වෙනවා.පස්සේ තවත් බාගයක් ඕඩර් කරන්න හදද්දී මම බොහොම අමාරුවෙන් දෙන්නව එලියට අරන් ආවේ.

රාජිතයව ත්‍රී වීල් එහෙක දාලා ගෙදර යවලා ප්‍රසන්නයවත් දාගෙන මම හොර පාරවල් වලින් ගෙදර ආවා.