66 කැවුමේ තිබ්බ විශේෂ දේ!!!!

මේ අවුරුදු දවස් වල ලංකාවේ හැමෝටම නම් කොයි මුල්ලක හිටියත් කැවුමක් නම් ඉතින් හම්බ වෙනවමනේ කන්ඩ.අපිටත් ඉතින් හම්බුන කැවුම් කොකිස් ගැන ආයේ අමුතුවෙන් කියන්න ඕන නැහැනේ!!

සික්ස් පැක් වලට මහන්සි වෙන නිසා මම නම් කැවුම් වැඩිය කෑවේ නැහැ මම කෑවෙම කොකිසුයි කේකුයි :)
ඒත් අද කොන්ඩ කැවුමක් අතට ගත්තා කන්න.මේ කැවුම අතට අරන් බලද්දී මගේ සිතුවිලි මෙව්වා එක හෙන ඈතට යන්න ගත්තා ඔව් ඒ මගේ පොඩි කාලේ.

මම හතර වසරේදී පෝතක බාලදක්ෂ කණ්ඩායමට බැඳුනා ඉස්කෝලෙදි.අපිට හිටියා ආකේලා කෙනෙක් ඔව් අක්කා කෙනෙක්.එතකොට බාලදක්ෂ ව්‍යාපාරය අපේ ඉස්කෝලේ ගොඩ නැගුවේ මනෝජ් සිල්වා කියලා සර් කෙනෙක්.අපි ක්‍රියා කාරකම් වගේ දේවල් කරේ ඉස්කෝලේ ඇතුලේමයි.ඒත් දවසක් මනෝජ් සර් කිව්වා පොඩි ට්‍රිප් එකක් යන් කියලා.

ට්‍රිප් එක තමයි
බෝපිටිය බීච් එකේ නාන්න!
සර් අපිව ගොඩක් ප්‍රවේසම් තැනකට තමා එක්කන් ගියේ ගල්වලින් වටවෙච්ච තැනක්.ඊට කලින් අපි ගියේ ඒ හරියේ සර් අඳුරන ගේකට.ගෙදරට ගිහින් කෑම කාලා නාන්න කොට කලිසම් ඇඳගෙන එද්දී ඒ ගෙදර නැන්දා අපිට කැවුම් මල්ලක් දුන්නා.අපි පොඩි කොල්ලෝ 15කුයි සර්යි ආකේලයි.මේ නැන්දගේ කටේ දතක් තිබ්බා ටිකක් ඉස්සරහට ඇවිත්.ඒ දවස් වලත් අපි පොඩියි කියලා නැහැ සර්ට හොරෙන් ඒ නැන්දගේ දත ගැන එක එක ඒවා කිය කිය අපි හිනා වේවි ආවේ.ඒ ගෙදර ඉඳන් වැල්ල පේන දුර.

ගිය ගමන් මඩ කරියෝ වගේ නාන්න පටන් ගත්තා ඊට පස්සේ සර් දර වගයක් ගොඩ ගහලා තෙල් දාලා දාලා ඇවිලුවා.(හවස හයට විතර) ඊට පස්සේ ඒක ගිනි මැලයක් වුනා.අපි කට්ටියවම ගිනිමැලය වටේ ඉන්දවලා සින්දු කිව්වා.ඔන්න ඔය වෙලේදී ආකෙලා කැවුම් මල්ල බෙදුවා!

කට්ටියම නාලා සීතලේ ගිනිමැලේට කිට්ටු වෙලා කැවුම් කනවා.එක පාරට මට කැවුම කද්දී ටකස් ගාලා මොනවා හරි හැපුණා.මම හිමිට මේ ටකස් ගාපු වස්තුව කටෙන් එලියට ගත්තා.මොකක්ද තිබ්බේ??

දතක්!!!

දත අතට අරන් ඒ දතක්මද කියලා බැලුවා ඔව් දතක්!!

මේ කැවුමේ දතක් ඊයා!!!! කියලා මම සූටි කටෙන් කට්ටියටම කිව්වා.ටික වෙලාවකින් සමහරු බොවෑ.....ක් බොවෑ.....ක් සමහරු කට තියෙන කැවුම් කෑලි විසික් කරලා කට හෝදනවා!.මනෝජ් සර්ත් කැවුම විසික් කරා.ඔක්කොටම කලින් එයා දත බැලුවා.දතක්මයි කියලා තහවුරු කරගෙන තමා එයාගේ කකා හිටිය කැවුමත් විසික් කරේ.මේ අතරේ පොඩි උන් කතා වුනේ අර කැවුම් දුන්න නැන්දගේ දික්වුනු දතේ අනිත් එක වෙන්න ඇති කියලා.

කොහොම හරි මනෝජ් සර් අපිට කිව්වා මේ ගැන කාටවත් කියන්න එපා කියලා.අඩුම තරමේ නැන්දටවත් ඉස්කෝලෙදි වෙන කාටවත් වත්!

ඊට පස්සේ අපි එදා එහෙන් ආවා.සර්ගේ වෑන් එහෙකින් තමා ට්‍රාන්ස්පෝට්! ඔය එන අතරේ මගේ දිව කට ඇතුලේ එක තැනක් හිඩැසක් තියෙනවා කියලා හොයාගත්තා.ටික වෙලාවක් යද්දීනේ මීටර් වුනේ!!!

මගේ හක්කේ තිබ්බා පොඩ්ඩක් විතර හෙල්ලි හෙල්ලි තිබ්බ දතක්.අන්න ඒ දත කැවුම් කද්දී කිසිම වේදනාවකින් තොරවම ගැලවිලා.

ඕක ඉතින් මම කාටවත් කියන්න ගියේ නැහැ සද්ද නැතුව වෙච්චි දේ ඒ විදියටම හිතාගන්න ඉඩ තියලා නිශ්ශබ්දව හිටියා!