110 තුවක්කුව!

ඔහු මැගසින් එක ඇතුල් කොට ලෝඩ් කර ඉහලට ඔසවා වෙඩිල්ලක් තැබුවේය එය ටකා..ස් යන ශබ්දය නගමින් තහඩු වහලේ ගැටෙන ශබ්දය ඇසුනත් උණ්ඩය කොහෙට ගියා දැයි මා හට දැකගත නොහැකි විය.

දැක්කනේ මල්ලි බඩු නිකන් ගින්දර වගේ.

හරි අයියා තව කීයක්‌ හරි අඩු කරලා දෙන්න බැරිද?

අපෝ බැහැ මල්ලි අපිත් මේවා සුළු ලාබයක් තියාගෙන කරන්නේ අන්තිම 150/= ක් දෙන්නකෝ.


රුපියල් එකසිය පනහක් ගෙවා ගත් පසු ප්ලාස්ටික් බෝල දමා වෙඩි තබන එම සෙල්ලම්  ලෝඩ් තුවක්කුව දැන් මා සතුය.තේවත්ත පල්ලියේ මංගල්ලෙට සෙල්ලම් බඩු කඩ රැසක් පල්ලි වෙළදාම් භූමියේ වෙළදාම් කරන්නේ තරඟෙට මෙනි.එම සෑම කඩයකටම හොඳ හැටි වෙළදාම් ඇති බවද කිව යුතුමය.

මා මිලදී ගත් එම බෝල තුවක්කුව දැන් මා හට අනර්ග වස්තුවකි කහ පාට චූටි චූටි ප්ලාස්ටික් බෝල පැකට්ටුවේ ඇති බෝල මැගසින් එකට ඇතුල් කොට එකින් එක ලෝඩ් කර වෙඩි තැබීමට මා ඉතා ඉක්මනින් හුරු වුනෙමි.එහෙත් ඉලක්ක ගැනීම ගැන නම් මම අදටද සතුටු නොවෙන්නෙමි.

මිලදී ගත් දිනට පහු දින සිට මා අනික් ළමුන් සමඟ සෙල්ලම් කිරීමට නොගොස් ගස් වල සිටි කුරුල්ලන් කපුටන් කුකුලන් බල්ලන් වැනි සතුන්ට වෙඩි තැබුවෙමි.එහෙත් එයින් එකක් දෙකක් හෝ වැදුනේ කනාවට ය නැතහොත් ඉතා සමීපයේ සිට වෙඩි තැබීමකින් පමණි.ඒ වෙඩි තැබීම් කිසි විටෙක කිසිම සතෙකුට දරුණු ප්‍රහාර නොවිය.

ගස් අතු වල වසා සිටි කුරුල්ලන් හට වෙඩි තැබුවත් හැම විටම එම ප්ලාස්ටික් බෝල හිස් අවකාශේ පාවෙවී ගියේ කුරුල්ලනුත් ප්ලාස්ටික් බෝලයත් අතර මීටරයක පමණ දුරක් තබාගෙනය.මේ අතර කාලයක් සෑදී තිබී පසුව සුව වුන ෂර්ලොක් හෝම්ස් උණ ආයේ හට ගැනින.ෂර්ලොක් හෝම්ස් හා සමානවම මා සෑම දෙයක් ගැනම ඉතා විමසිල්ලෙන් බැලිය.තුවක්කුවක් අතේ තබාගෙන නිකම් කුරුල්ලන්ටයි බල්ලන්ටයි වෙඩි තැබීමෙන් මා සෑහීමකට පත් නුවූයෙමි.

උණ්ඩ

මිතුරන් දෙස පවා විමසිලිවත්ව බැලූ මා හට සියලු දෙනා අපරාධ කරුවන් මෙන් පෙනුනි.මගේ තුවක්කුවෙන් වෙඩි කෑ සමහරක් මිතුරන් මා ගැන පැමිණිලි ද කර තිබුනේ මාගේ මවට ය.හිරේ දැමීමට තරම් කූඩුවක් ගෙදර නොතිබුණු බැවින් කරුණු විමසීම් පසුවලින් ඒ සෑම අවස්ථාවකම "ආයෙත් කරන්නේ නැහැ" යන පොරොන්දුව මත නිදහස් වීමි.

එහෙත් එම පොරොන්දුව බාලගිරි දෝෂය මෙන් විය.එකල දිනක් මා අප නිවසට ඉදිරියෙන් වූ පොල් ගස් හා කැලෑ වල් වැදී තිබු වත්ත වෙත ඇතුළු වුයේ රහස් පරීක්ෂක වැඩකටය.මාගේ සඟයා වූ වොට්සන් වුයේ විටෙක මා අතින් වෙඩි කෑ අහිංසක පපියා ය.ඌට ඇති වැඩක් නුවුවත් ඌත් බිම ඉඹ ඉඹ මා පසුපස ආවේ මා හට අවංක සිතින් උදව් කිරීමට විය හැක.

වත්තේ ඔබමොබ සැරිසරමින් රහස් පරීක්ෂක කටයුතු වල නිරත වෙමින් සිටි මා හදිසියේම දුටුවේ අපරාධකරුවෙක්වය.සරම දෙකට නවා ඇදගෙන වැනි වැනි කුනුහරපත් දොඩවාගෙන බමන මතින් මත් වී ඒ පැමිණියේ සියාතු මාමය.ගමේ පොඩි උන් ඌට බය ය.මම නම් ඔහුට බය නැත පදිරි වුවා පමණි.මේ මොහොතේත් පදිරි වුවත් අතේ තුවක්කුවකුත් තබාගෙන බිය වන්නේ අහවල් දේට ඈ?

මා එක අතකින් තුවක්කුව උඩු අතට දික් කරගෙන පොල් ගසකට මුවා වුයෙමි.ගස මට වඩා හීනිය.මා ගසට වඩා පළල් ය.එහෙත් සියාතුවා මාව දැක්කත් පොල් ගස ඇදුමක් ඇද සිටිනවා යනුවෙන් අනුමාන කල හැක.මන්ද ඒ ඔහුගේ හැටිය.

දැන් දැන් ක්‍රම ක්‍රමයෙන් සියාතුවා වැනි වැනි මොනවද මන්දා කියවමින් ඉදිරිපස පාරෙහි ගමනේ යති.වොට්සන් නොහොත් පපියා බිම ඉදගෙන සිදුවීමට යන ක්‍රියාන්විතය දෙස දෑස් අයා නිදිමතේ බලාසිටියේ ය.සියාතුව මා සිටි ඉසව්වට කෙලින් පාරෙහි යති තුවක්කුව ඔහු දෙසට එල්ල කර මා ඉලක්ක කෙරුවේය.ඒ මොහොතේ මා හට ඔහු පෙනුනේ බ්‍රිඩ්ජ් මාලිගයෙහි කුමාරියගේ දියමන්ති මාලය ඔහුගේ අතේ තිබු බවක්ය(පසුව දැනගත් පරිදි එය අඩක් ඉතිරි වූ කසිප්පු බෝතලයක් ය).

සියාතුවා සිහිනෙන්වත් ඒ මොහොතේ නොසිතන්නට ඇත තමන් දෙස තුවක්කුවක් එල්ල කොට හෝම්ස් ඔහු දෙස බලා සිටින බවක්.එහෙත් ඒ බව දැන සිටි අයෙකු විය ඒ පපියා ය.ඔලුවටම තියනව කුඩු වෙන්න කියා සිතු මා සියාතුවාගේ ඔලුව දෙසට මාන අල්ලා කොකා ගැස්සිය.

ප්ලාස්ටික් බෝලය විදුලි වේගයෙන් වාතලය මත ඇදී ගියේය.මොහොතක් ගත වීමටත් පෙර සියාතුවා
අම්මෝ @@!!!@@
මොන **තාද මට කැටපොලු වලින් විදින්නේ?.වරෙන් *කයෝ එලියට! ෆේස් ටු ෆේස් ගහගමු.
යනුවෙන් මරණ බියේ කෑ ගසන්නට විය අහල පහල එකෙකු දෙන්නෙකු දුව ආවෝ ය!.ප්ලාස්ටික් බෝලය සියාතුවාගේ ඇහේ වැදී ඇත. පසුව එම ස්ථානය වෙත පැමිණි ගෙදර පොලිසියේ ස්ථානාධිපතිනිය(මව් තුමිය) මාව අත් අඩංගුවට ගෙන කරුණු විමසීමක් සිදු කළා ය.

මා වැරදි කරු වුයේ ය.බලන්නට පැමිණි වුන්ගෙන් සමහරෙක් හිනා වෙමින් ගියෝ ය.තවත් සමහරුන් සියාතුවට හොඳ වැඩේ යැයි පවසමින් ද ගියෝ ය.එවෙලේ මා හට පෙනුණු එලොවටත් නැති මෙලොවටත් නැති ගන්ධබ්බයන් මෙන් පිරිසක් මට බැන බැන ගියෝ ය.

පසුව තුවක්කුව ටික දවසකට රාජසන්තක විය ඉතිරි වූ ප්ලාස්ටික් බෝල පැකට්ටුව මිතුරෙක් යන එකෙක් පැමිණ රැගෙන ගියේ ය.මාගේ හෝම්ස් උණ පහවිය.පපියා නිකම්ම නිකන් පපියා වුයේ ය.
                                                                                                               

                                                                          -නිර්මාණයක් පමණක්ම නොව
__________________________________________________________________________
තුවක්කු ගැන ලියන්නේ විචාරක මහත්මයානේ ඔහුට තරම් ඒ වගේ හසල දැනුමක් ඇති කෙනෙක් බ්ලොග් අවකාශේ නැති තරම්.ඒත් මේ ලිපිය ලියවුනේ මාගේ පරණ සෙල්ලම් බඩු අතර බෝල තුවක්කුවත් කෑලි කැඩී කොටස් වශයෙන් තිබෙනු දැකය.

අනික තේවත්තේ පල්ලියේ මංගල්‍ය එනවා කියන්නේ හැම අවුරුද්දෙම මංගල්ලේ දවස් වලට ඔය කියන වෙලදාම් භූමියට යනවා ඇවිදින්න.යාළුවො එක්කත් යනවා,ගෙදර අයත් එක්කත් යනවා.ගිහින් මොනවා හරි කාලා අයිස්ක්‍රීමුත් කාලා අන්තිමට අච්චාරුත් කාලා එක එක කඩවල් වලිනුත් මොනා මොනා හරි අරන් තමා ගෙදර එන්නේ.මම පොඩි කාලේ නම් ඔය වගේ සෙල්ලම් බඩු තමයි ගත්තේ.අම්මා නම් වලන් සෙට් මග්ස් අරව මේවා තමා.ඒත් දැන් නම් මම  ගන්නේ මුදු,හෑන්ඩ් බෑන්ඩ්,ඩි.වී.ඩිස් වගේ එව්වා මෙව්වා අම්මා නම් තාම අර ඉස්සර වගේ වලන් සෙට් මග්ස් එව්වා මෙව්වා තමා :)

තේවත්තේ පල්ලියේ මංගල්ලේත් මේ මාසේ 28  එනවා.