101 නමක් නැති සම්බන්ධතාවය!

වින්ඩෝස් මෙහයුම් පද්ධතිය ගත්තොත් ඒක විවිධ ක්‍රම ලේඛන භාෂා වලින් ලියවුන,විවිධ වැඩ සටහන් වලින් එකතු වෙලා අපේ අතට එන නිර්මාණයක්.අපේ ජීවිතත් එහෙමයි අපේ ජීවිතත් හැදිලා තියෙන්නේ විවිධ අවස්ථා තුලින්.මේ ගත කරන මොහොතත් එක අවස්ථාවක් එහෙමත් නැත්තම් මොහොතක් විතරයි.

සමහර අය ජීවිතේ නැති කරගන්නවා අකමැති අවස්ථාවන්ට මුහුණ දුන්නම,තවත් සමහරු අවස්ථා හදාගන්නවා ජීවත් වෙන්න.අපි හැමෝටමත් දුක්බර අවස්ථා මතු වෙලා ඇති ඒ වගේම සතුටුදායක අවස්ථා වලටත් මුහුණ දීලා ඇති.ඔය වගේ අවස්ථා වලින් අපිට අවස්ථා කීයක් නම් මතකේ රැඳී ඇද්ද?

එහෙම රැදෙන්නෙත් විශේෂ අවස්ථා විතරයි.නැතුව අනිත් අවස්ථා අපි මතක් කරලම ගන්න ඕන නැත්ත ඒවා මතක් වෙන්නෙත් නැහැ.ඔය වගේ අවස්ථා හතරක් මටත් තියෙනවා ඒවා එකිනෙකට බැඳුනු ඒවා.මම දන්නේ නැහැ ඒවා විශේෂයි ද කියලා ඒත් මට ඒ අවස්ථා හතර අමතක වෙන්නෙම නැහැ.


පලවෙනි අවස්ථාව තමයි මගේ යාලුවෙක්ගෙ මල්ලි කෙනෙක් මැරතන් එකක් දුවද්දී යාළුවයි මමයි මෝටර් බයික් එහෙක පස්සෙන් ගියා වතුර බාල්දි,ග්ලුකෝස් පැකට් එහෙම අරගෙන සප් එක දෙන්න.ඒත් මේ මල්ලියා මැරතන් එකෙන් හැලුනා හතිය වගේ ඇවිල්ලා.ඔය මැරතන් එකේ දුවන්නේ ඔක්කොම ගමේ උන්නේ.ඉතින් අපි දෙන්නා මල්ලිව ත්‍රී වීල් එහෙක දාලා අනිත් දුවන උන් පස්සේන් ගියා වතුර පාරක් හරි ගහන්න.ඒත් අපි යද්දී සෙට් එකම ඉවර කරන තැනට ගිහින්,අපිත් දැන් යනවා එතනට ඔහොම යද්දී මැරතන් එක ඉවර වෙන ස්ථානයට මීටර් 200ක් විතර ඈතින් තැනක්.මිනිස්සු කට්ටියක් වතුර බාල්දි තියාගෙන ඉන්නවා තව දුවන එවුන් එනවද බලාගෙන.ඔන්න ඔය හරියක තමා එයා හිටියේ!

මගේ තියෙන කුප්ප කමට බාල්දියේ ඉතුරු වෙලා තිබ්බ වතුර ටික මම එයාට ගැහුවා.එයා හානේ කියාගෙන පස්සට පැන්නත් වතුර පාර වැදිලා ඉවරයි ඉහින් කනින් කටින් වතුර බේරෙනවා.බයික් එක පැදන් ගිය එකත් ඇරලා දාලා ගියා.අපි දැන් රේස් එක ඉවර වෙන තැනට ගිහින් දුවපු උන් එක්ක කයියක් ගහන් ඉද්දී ඔන්න අරයා එනවා වෙන ඇඳුමකින් සැරසිලා.මගේ යාලුවත් බය වෙලා මම හිතුවෙත් මට බනිවි කියලා.ඒත් බැන්නේ නැහැ මගේ දිහා බලාගෙන හිනා වේගෙන ගියා එච්චරයි.

දෙවෙනි අවස්ථාව සිද්ද වුනේ වතුර ගහපු සීන් එකෙන් සතියකට විතර පස්සේ,දවසක් අම්මයි මමයි රාගම ෆුඩ් සිටියට ගියේ අම්මට ඕන කරන බඩු වගයක් ගන්න.අම්මා එක එක බඩු තෝර තෝර යනවා මමත් අර බඩු දාන ට්‍රොලියක් තල්ලු කරන් මොනාද කාපු මොකාද එකා වගේ අම්මගේ පස්සෙන් යනවා.ඔහොම යද්දී ඔන්න අරයාත් ඉන්නවා ට්‍රොලියක් තියාගෙන රාක්ක වලින් මොනවද අතට අරන් බල බල.මෙයා මාව දැකලා හිනා වුනා.මාත් හිනා වුනා එහෙම හිනා වෙලා එයා ආයේ බඩු තෝරනවා ඔන්න ඔය අවස්ථාවේ මගේ කුප්ප කම ආයේ මතු වුනා.

එයා ට්‍රොලියට බඩු දාලා අනිත් පැත්ත හැරිලා තව මොනවද තෝරනවා අම්මත් මොකක්ද ආටා පිටිද මොනාද මන්දා එකක් හොයනවා.ඒ හරියේ රාක්ක වල තියෙන්නෙම පිටි ජාති.මාත් ඉතින් අතට අරන් බැලුවා.රතු කැකුළු පිටි,උළුඳු පිටි,කුරක්කන් පිටි අර පිටි මේ පිටි එක එක ජාතියේ පිටි පැකට්.මම මොකද කරේ? අර කියපු පිටි පැකට් නම් බැලුවෙත් නැහැ දඩි බිඩි ගාලා හතරක් පහක් අරන් සද්ද නැතුව අරයගෙ ට්‍රොලියෙන් දැම්මා.තව ඊට එහායින් තිබ්බ වැනිලා බෝතල්,බේකින් පවුඩර් ටින් තව තව මොනවද මන්දා පොඩි පොඩි පැකට් වගේ ඒවා ජාති ගොඩකුත් දැම්මා කුප්ප කමනේ ඉතින් මගෙත්.

අම්මට බඩු අරන් එන්න කියලා මම වෙන පැත්තකට ගියා එදත් එච්චරයි.එතනින් එහා මොනවා වුනාද දන්නේ නැහැ.මම ඊට පස්සේ එයාව දැක්කෙත් නැහැ,සමහර විට අපිට කලින් එයා යන්න ඇති නැත්තම් අපි එද්දිත් තව තව ඒවා තෝර තෝර ඇතුලේ ඉන්නත් ඇති.

තුන්වෙනි අවස්ථාවේ මම එයාව දැක්කේ ප්‍රයිවට් ක්ලාස් එකක් ළඟ.එයත් මාව දැක්කා මම එවේලේත් අර මුල් අවස්ථාවේ වගේම ටිකක් ලැජ්ජාවෙන් හිටියේ මොනවා හරි කියයිද කියලා ම්හ් හ්ම් මුකුත් නැහැ හිනා වුනා විතරයි එච්චරයි කුප්ප වැඩත් නැහැ මුකුත් නැහැ.

ඔන්න හතර වෙනි අවස්ථාව.ඒ මම එයාව දැක්ක හතර වෙනි පාරත් ඒකයි ඒ ඊයේ.
ඒ වෙඩින් හෝල් එකක්!එයා තමා මනමාලි,සුදු පාට වෙඩින් සාරි එකක් ඇඳන් ඒකටම මැච් වෙන බුකි එකකුත් අතේ තියාගෙන කාර් එකකට නගිනවා.මම එතනට ගියේ එතන වේටර් වැඩ කරන මගේ  යාලුවෙක් හම්බ වෙන්න.වෙනදා වගේම එයත් මාව දැක්කා හිනා වුනා කාර් එකට නැග්ගා,ටිකක් වයස පාට වුනාට පොෂ් ලුක් එකක් තියෙන මනමාලයා අනිත් පැත්තෙන් නැග්ගා ගියා,ඥාති කට්ටිය ටික දුරක් හෙමින් හෙමින් ගිය කාර් එක පස්සෙන් ඇවිදන් ගියා.එච්චරයි ඒත් ඒ අවස්ථා හතරම මට නිකන් විශේෂයි විශේෂයි වගේ,ඒකට හේතුවක් නම් මම දන්නේ නැහැ අනික අපි හිත මිත්‍රයොත් නෙමේ ඊට එහා ගිය දේකුත් නැහැ මගේ හිතේ.

ඉතින් කාට හරි කියන්න පුලුවන්ද අපි අතරේ ඒ සම්බන්දෙට කියන නම?



__________________________________________________________________________

මේ පින්තූරේ තියෙන වැරැද්ද හොයන්න පුලුවන්ද බලන්න අවංකයෙන්ම?