114 ඩයලොග්කරණයෙන් සන්ටෙල් පාරිභෝගිකයන්ට කුඩම්මාගේ සැළකිලි!

සන්ටෙල් කියන්න අපේ රටේ දැවැන්ත ව්‍යාපාරයක් සන්ටෙල් සමාගමේ අතීතය හොයන්න ගියොත් මට පිස්සු හැදෙනවා ඒත් මට මතක කාලේ ඉඳන් ටෙලිකොම් සමාගමත් එක්ක කරට කර තරඟ කරමින් ආපු සන්ටෙල් CDMA කරලියට ආවේ ලංකා බෙල් ආගමනයත් සමඟ. ඒ 2005 වර්ෂයේ කෙසේ වෙතත් පාරිභෝගිකයන්ට හොඳ සේවාවක් ලබාදෙන්නට ඔවුන් සමත් වුනා.


ජීවිතේට ෆෝන් නොතිබ්බ අපිත් ඒ දවස් වල "ගියා ගත්තා ආවා" කියන වෙළඳ දැන්වීම දැකලා ගෙනාව සන්ටෙල් CDMA ෆෝන් එකක්.ඒ දවස් වල රැහැන් සහිත සබදතාවයක් ගන්නවා නම් සෑහෙන්න ගානක් ගෙවන්න සිද්ද වෙනවා.ඒක නිසා CDMA ක්‍රමය නැගලා ගියා.හැම ගේකම වගේ ඔය කාලේ CDMA එකක් තිබ්බා.

අද වන විට අවුරුදු 7ක් ගත වෙලත් CDMA වල ජනප්‍රියතාවය අඩු වෙලා නැහැ කියලා මම හිතනවා.සන්ටෙල් සමාගම හා අපි අතර හොඳ සම්බන්දතාවයක් තිබ්බා.වත්තල සන්ටෙල් ශාඛාවේ අය අපේ හිත මිතුරන් වගේ.එහෙත් පහුගිය කාලේදී සන්ටෙල් බිල් පත් එන්න ගත්තේ ඩයලොග් ලාංජනය ඇති ලියුම් කවර වල.

ක්‍රම ක්‍රමයෙන් තාත්තගේ දෙවෙනි අඹුවගේ වෙනස් කම් ළමයින්ට දැනෙනවා වගේ අපිටත් ඩයලොග් එකේ වෙනස් කම දැනෙන්න ගත්තා.රුපියල් 1500ක් වගේ බිල් වලටත් ලයින් එක විසන්දී කරා.ඒත් සන්ටෙල් අය නම් ඉස්සර පන්හයදහා වැනි ගණන් එකතු වෙලා තියෙද්දිත් කෝල් කරනවා,ගෙවන්න කල් දෙනවා එහෙමත් නැත්තම් ටික ටික ගෙවන්න අවස්තාව දෙනවා.ඔවුන් ලේසියෙන් සබදතාවය විසන්ඳි කරේ නැහැ.

එහෙත් ඩයලොග් වලට ගත්තායින් පසු ඔවුන් එක් දැනුම් දීමකින් පසු සම්බන්දතාවය විසන්දි කරා.
දැන් ඕගොල්ලෝ බලනවා ඇති බිල ගෙව්වා නම් ඉවරනේ ප්‍රශ්නයක් නැහැනේ කියලා.නැහැ තව ප්‍රශ්නයක් තියෙනවා.

සන්ටෙල් එකෙන් ඔය ලබාදෙන CDMA දුරකථන විවිධ සමාගම් වලට අයත් ඒවා.(දන්නා තරමින් හුවායි එකේ).මේ දුරකථන  විටින් විට දෝෂ ගෙන දෙනවා.ඒත් අපි ඒවා පැමිණිලි කරපු ගමන් ඔවුන් දන්වන්නේ වත්තල ශාකාවට රැගෙන විත් වෙන එකක් මාරු කරගෙන යන ලෙසයි.මෙසේ කීප වරක්ම අපි ෆෝන් මාරු කරා එයාලත් එක එක මොඩ්ල් වලින් ෆෝන්ස් අපිට දීලා තියෙනවා.එක පාරක් ෆෝන් එකක් කැඩිලා අපි ඔවුන්ට කිව්වා මේක හරි කරදරයක්නේ ඔයාලගේ ෆෝන්ස් හැමතිස්සෙම කැඩෙනවානේ කියලා.

එතකොට එයාල ගෙදරටම එව්වා අලුත්ම ෆෝන් එකක් බයික් එහෙකින් ආපු අයෙකු අතේ.ඒ දුරකතනය ගොඩක් කල් පාවිච්චි කරා තාමත් තියෙන්නෙත් ඒක.දැන් ආයෙමත් ඒකෙත් ලෙඩක්.ලෙඩේ ගැන කිව්වොත් ෆෝන් එකේ ඩිස්ප්ලේ එක වෙලාවකට කිසිම දෙයක් පේන්නේ නැහැ.ඒ වගේම අංක 9 බොත්තම වැඩ කරන්නේ නැහැ.ඉතින් අපි මේක ඔවුන්ට දැන්වුවා.ඒ ඩයලොග් වුනාට පස්සේ.

කලින් නම් වත්තලට ගේන්න කිව්වට දැන් කියන්නේ කිරිබත්ගොඩට ගේන්න කියලා.අපිට මේක ගෙනියන්න වෙලාවක් තිබ්බේ නැහැ.ඒක නිසා ෆෝන් එක පැත්තකට දාලා වගේ තමා තිබ්බේ.එහෙම නිකන් තියෙද්දිත් බිල් එනවා ග්‍රාහක කුලී,ගොඩනැගිලි බදු,සහ තවත් අපි නොදන්න මොනවදෝ මන්දා බදු වගයක්.

ඔන්න ඕවා එකතු වෙලා තමා 1500ක ඇරියස් තිබිලා ඩිස්කනෙක්ට් කරලා තියෙන්නේ.අපි බිල ගෙවන්නත් එක්ක ෆෝන් එකත් අරන් ගියා කිරිබත්ගොඩ ඩයලොග් ශාඛා දෙකකට.පළමු එකෙන් හිනා වෙලා පිළිගත්තත් සන්ටෙල් එක මාරු කරගන්න ඕන කතාව කිව්ව ගමන් කුඩම්මාගේ සැළකිලි පෙන්නුවා.අපිව වැඩිය ගණන් ගත්තෙත් නැහැ.ඒගොල්ලෝ කිව්වේ අද සිස්ටම් ඩවුන් එකක් ඒක නිසා හෙට උදේ දහයෙන් පස්සේ අරන් එන්න කියලා.

ආයේ ගෙදර ගිහින් හෙටත් වරෙන්කො මේක උස්සන්.තියලා යන්නත් එපා කිව්වා.

මේ තියෙන්නේ ලදරම

එතනින් එලියට ඇවිත් කිරිබත්ගොඩ ටවුන් එකේම තියෙන ශාඛාවටත් ගියා.ඔන්න එතන හිටපු ටිකක් නෝන්ජල් ගතියකින් යුක්ත කොට සායක් ඇඳන් හිටපු අක්කා කෙනෙක් ෆෝන් එක බලන්න ඕන චාජරේ ගේන්න කියලා.මම චාජරේ ගේන්න වාහනේට ගිය වෙලේ ඒ අක්කා අපේ අම්මට සන්ටෙල් එකේ වැරදි ගොඩක් කියලා.සන්ටෙල්ලා පාඩු පිට එහෙම පිටින්ම ඩයලොග් එකට දුන්නලු.(ඉතින් ගත්තේ මොකටද?)

සන්ටෙල්ලාගේ ෆෝන් හරි බාලයිලු.(මම හිටියා නම් අහනවා ෆෝන් හදන්නේ සන්ටෙල් එකෙන්ද කියලා.)
මම චාජරේ ගෙනාවට පස්සේ ලැසි ගමනින් ගිහින් ෆෝන් එක ගහලා බැලුවා.ලෙඩේ එයා දැක්කා ඒත් ලඟට ඇවිත් කියනවා චාජරේ ඩැමේජ් වෙලාලු ඒක නිසා එතනින් බාරගන්නේ නැහැල්ලු.ආකේඩ් එකට යන්නලු කොළඹ,එතනින් සුළු ගෙවීමකින් මාරු කරගන්න පුළුවන්ලු.

මදැයි චාජරේ පොඩි පළුද්දක් පෙන්වලා එහෙම කියනවා දැන් අතින් ගෙවපන්කෝ.චාජරේ මාරු කරන්න ඕන නැහැ ෆෝන් එක විතරක් මාරු කරලා දෙන්න කිව්වම එහෙම බැහැලු මුළු යුනිට් එකම තමාලු මාරු කරන්නේ.එකක් හරි ඩැමෙජ් වෙලා තිබ්බොත් බාරගන්න එපා කියලා ඉහලින් නියෝග කරලලු තියෙන්නේ.

අපි ෆෝන් එක ගෙදර ගෙනල්ල ඔන්න ආයේ පැත්තකට දාලා තියෙනවා.ව්‍යාපාර කඩා වැටෙන එක සාමාන්‍ය දෙයක් ඒත් සන්ටෙල් සමාගමේ විධායක වරුත් දැනගන්න ඕන තමන්ගේ පාරිභෝගිකයන්ට අසාධාරණයක් නොවෙන්න වග බලාගන්න.