111 මෙන්න නයෙක්!!

මම දැන් මෙන්න නයෙක් කියලා හෙඩිම දැම්මම කට්ටිය ටක් ගාලා දුවන් එනවා කව්රු හරි ඇරපු නයෙක්ට මඩක් කියලා හිතාගෙන.එතකොට මට ට්‍රැෆිකුත් වැඩි වෙනවා.ඒත් මම මේ ටික උඩින්ම දැම්මේ සින්ඩි වල පේන්න මේක මඩක් නෙමේ කියලා ඈ.


කට්ටිය අහලා තියෙනවා නේද ගැරඬියා කියලා සතෙක් ගැන?
අර තෙල් තෙල් වගේ දිලිසෙන ඉතාමත් පිළිකුල් සහගත නිර්විස සර්පයා? ආ ආ අන්න ඌ තමා ඔය සර්පයා බොහොම සුලබයිනේ.ගමේ ගොඩේ වත්තේ පිටියේ හැමතැනකම වගේ ඉස්සර හිටියා.දැන්නම් ටිකක් අඩුයි.

ඔය ගැරඬි සංහතියටම එකෙක් ලෙස සලකා මම ඌ කියන්නම්.මේ ගැරඬින්ටයි මටයි අතිතේ ඉඳන්ම සබඳකම් තියෙනවා.ඔව් මම පොඩි කාලේ ඕකුන්ට හෙන බයයි දැන්නම් බය නැහැ ඒත් දැනුත් ටිකක් බයයි.ඉස්සර මම පොඩි කාලේ මුන් හරියට හිටියා අපේ ගෙවල් පැත්තේ.මීයෝ අල්ලන්න ගෙට එනවා.දවසක් පොත් මේසේ උඩ තව දවසක් ඇඳේ තවත් දවසක අල්මාරිය උඩ.හිතාගන්න පුළුවන්නේ මම කොච්චර බය වෙන්න ඇතිද කියලා ඒ කාලේ පොඩි එකෙක්නේ.අනික දිලිසි දිලිසි ඉද්දි හෙන අප්පිරිය ගතියක් තමයි මට නම් එන්නේ.මම මේ කියන ඔය මගේ පොඩි කාලේ ගැරඬි සතියකට පාරක් වත් ගෙට එනවා.ඕකුන් ආවම මම එලියට දුවලා ගෙට එන්නේ හවස් වුනාම.කව්රු හරි භූමිතෙල් ටිකක් ගහලා එලෙව්වොත් ඌ යනවා ඇහැට දැක්කොත් විතරයි මගේ බය නැතුව යන්නේ.නැත්තම් දවසක් දෙකක් යනකන්ම හිතට හරි නැහැ.

අපේ ගෙදර ඇඳ යට බඩු කෝටියයි.ඕක අස්සට ගැරඬියා රිංගුවොත් එහෙම ආයේ එලවනවා බොරු.ඉතින් රෑටත් පන බයයි ගැරඬියා ඇඳ යට ඇති කියලා.ඒත් ලොකු වෙද්දී තමයි තේරුම් ගත්තේ ගැරඬි එක තැනක ඉන්න සත්තු නෙවේ කියලා.

පොඩි කාලේ මම ඕවා දන්නේ නැහැනේ.ඒත් දැනන් හිටියා ගැරඬි බල්ලෝ වගේ හපනවා කියලා.අම්මෝ කොහොමද කෑවොත්?හැබැයි ඇත්තද දන්නේ නැහැ ගැරඬි කෑවොත් වෙන කිසිම සර්පයෙක් කන්නේ නැහැලු.ගැරඬියා පහත්ම කුලේ සර්ප ගණයෙලු ඒක නිසා උගේ බයිට් එකට ලක්වෙන මිනිස්සුන්ව වෙන සර්පයෝ කන්නේ නැහැල්ලු අප්පිරියයි කියලා.

පස්සේ කාලේ මම ගැරඬි ගෙට ආවම භූමිතෙල් ටිකක් ඌ ඉන්න පැත්තට ගහලා දුවනවා හැතප්මයක් විතර.භූමිතෙල් නිසි ඉලක්කයකින් තොරව විසි වෙලා ඌට නොවැදුනත් ඒ ගඳට ඌ යනවා.තවත් ටිකක් ලොකු වුනාම භූමිතෙල් ගහලා හැතැප්ම බාගයයි දිව්වේ.ඊටත් පස්සේ මීටර් සීයක් දෙසීයක් වගේ තමයි මතක විදියට දිව්වේ හරියටම මනින්න බැරි වුනා.ඊටත් පස්සේ භූම්තෙල් ගහලා පුටුවක් උඩට නැගලා ගැහි ගැහි හිටියා මතක විදියට දැනුත් එහෙමද කොහෙද.

හැබැයි දැන්නම් නාගරීකරණය වෙමින් පවතින නිසා අපේ පැත්තේ ගැරඬි අඩුයි.ඉඳලා හිටලා එන්නේ.ඉස්සර ආවා තඩි සයිස් ගැරඬි උන් නාකි වෙලා උන්ගේ පැටව් ආවා මාව බලලා යන්න.ඒ පැටවුත් ලොකු වෙලා තඩි සයිස් වෙලා එනවා.එත් දැන් අඩුයි විශ්වාස කරන්න දැන් ගැරඬියෙක් ගෙට එන්නේ මාස දෙක තුනකට පාරක්.

ඔය ගැරඬි ගැනත් අමුතු අමුතු කතා තියෙනවා.අර මම කිව්වා වගේ හපන්නේ කළු ගැරඬි,දුඹුරු පාට වුන් අහින්සකයිලු,කහ ගැරඬි ගෙට එන්න හොඳ නැහැලු ගෙදරට කරදරයිලු.ඔය වගේ විවිධ කතා තියෙනවා.දැන් කියන්න එපැයි අද කතාව.

මේ ඊයේ පෙරේදත් මට ඇහුනා වලන් මැස්සේ වලන් පෙරලෙන සද්දයක්.මම ගිහින් බැලුවා මොකෙක් වත් පේන්න නැහැ දිග ලීයක් අරන් වළඳක් දෙකක් හොල්ලලා බැලුවා අම්මිට සිරි මෙන්න ගැරඬියෙක් කළු පාටට හුරුවට.මම තනි තැන බය වෙලා දුවන්නත් හදලා කකුල් දෙකට පුරුෂ ශක්තිය අරගෙන දිව්වද? නැහැ

මම දිව්වේ නැහැ මට මන් ගැන හෙන ආඩම්බරයි ඈ.මම ලිප ගාව තිබ්බ භූමිතෙල් බෝතලේ අරගෙන මූඩියට ටිකක් දාලා ගැරඬියට ගහලයි දිව්වේ.වැඩිය දුර දිව්වේ නැහැ ටික දුරයි.පස්සේ මම ආයේ ඇවිත් බැලුවා මූ කොහෙට හරි ගිහින්.

මාත් ගෙට ඇවිත් ටීවී බල බල ඉද්දි ඔන්න මූ ආයේ එනවා බිත්තිය උඩින් අයියෝ මල වදේ මට ටීවී බලන්න දෙන්නෙත් නැහැනේ කියාගෙන මම දුවලා ගිහින් භූමිතෙල් බෝතලේ ගෙනත් ප්ලාස්ටික් පුටුවක් උඩට නැගලා ක්ෂෙනික මූඩියට ටිකක් දාලා ගැහුවා.මොකද ගෙයි ඇතුල් පැත්තට බැස්සොත් වැඩ ගොඩයිනේ මූව එලවන්න.එත් ගෙයි ඇතුල් පැත්තට බහින්න කලින් එලිය පැත්තටම එලෙව්වම මාර සැනසීමයි හිතට.

පලවෙනි භූමිතෙල් පාර අහලකටවත් වැදුනේ නැති නිසා මෙන්න මූ ස්ස්ස් ගාලා පිඹලා මට පෙනේ පිප්පුවා.හිතන්න ඇති මාව බය කරන්න හුහ් ගැහුවා තවත් භූම්තෙල් පාරක්.ඔන්න ඒකනම් ඇඟට නොවැදුනත් ළඟටම ගිහින් ඌට භූමිතෙල් ගද දැනුණ නිසාද කොහෙද හරි හදිසියෙන් වගේ එලිය පැත්තටම බැස්සා.හම්මේ දැන්නම් සැනසීමයි.

එත් අනේ මන්දා හිතට අප්සෙට් මූ මට පෙනේ  පිප්පුවනේ ඉස්සර ගැරඬි නම් එහෙම නැහැ උන් හරි හිතවත් එත් අද ආපු එකා.මම හොඳට කල්පනා කරා ඌද මට පෙනේ පිප්පුවේ මමද ඌට පෙනේ පිප්පුවේ?.හොඳටම ෂුවර් ඌනේ පෙනේ පිප්පුවේ.හෑ ගැරඬි කවද්ද බොලේ පෙනේ පිප්පුවේ?හුටා මම නැගලා හිටිය පුටුව නිකන් වෙවුලනවා වගේ දැනුනා නැතුව මගේ කකුල් නෙවේ වෙවුලුවේ.පොඩ්ඩක් චූ බරකුත් හැදුනා වගේ.පිස්සුද චූ ගියේ නැහැ කෑ ගහගෙන දිව්වා ඉස්සරහ ගෙදර අයියාව එක්කන් එන්න.ගිහින් ඌට සීන් එක කියලා එක්කන් ආවා.පෙනේ පුප්පපු ගැරඬියා ආහ වැරදුනා නයා බැස්ස බිත්තිය පැත්තේබැලුවා.ඒ පැත්තේ නැහැ එහෙනම් ඌ එහෙම්ම අල්ලපු වත්තට පැනලා.

අල්ලපු ගෙදරට ගිහින් ඒ අංකල්ට සීන් එක කිව්වම ඒ අංකල් අපිට පොඩ්ඩක් බලන්න කියලා එයා ගියා දනිස්ස ලඟටම කවර් වෙන බූට් දෙකක් හොයන්න.එයානම් කිව්වේ එයාගේ වත්තේ බෝතල් කටු තියෙනවා ඒවා කකුලේ ඇනෙයි කියලා බයටලු බූට් දෙක ගේන්න යන්නේ.

අපි ගිහින් ඒ වත්තේ හෙව්වා අපි කිව්වේ ඉස්සරහ ගෙදර අයියට හොඳේ.මුළු වත්තම පීරුවත් හම්බුනේ නම් නැහැ සමහර විට ඌ ඒ වත්තෙනුත් එහා වත්තට පැනලා යන්න ඇති.මම මේ සීන් එකෙන් පාඩමක් ඉගෙන ගත්තා භූමිතෙල් වලට ගැරඬි විතරක් නෙවේ නයි වුනත් එලෙව්වහැකි කියලා..තව පොඩි කුජීත සීන් එකක් තියෙනවා ලියන්න එත් දිග වැඩි වෙයිද මන්දා.එහෙමයි කියලා පස්සේ දවසක ලියන්නත් බැහැ එතකොට අවුට් ඔෆ් ටොපික්.

ඔය අල්ලපු ගෙදර අංකල් කාරයට මාව දිරවන්නේ නැහැ මට ඌව දිරවන්නේ නැහැ.ඒකට හේතු ගොඩක් තියෙනවා ගොඩක්ම මගේ කුප්ප කම නිසා වෙච්ච දේවල් තමා.

දවසක් ඔහොම ආපු ගැරඬියෙක් එලෙව්වා මම එදත් ඔය කියන වත්ත පැත්තට තමා ඌ ගියේ.මම ඒ පැත්තට ගිහින් බලද්දී ඔන්න අංකල් කාරය ඉන්නවා.ඌ බලන් ඉන්නේ මම මොකද කරන්නේ කියලා.මම විහිලුවටත් එක්ක අංකල් ඔන්න ඔය පැත්තට නයෙක් ආවා ඔලුවේ පයන්නකුත් තිබ්බා කියලා.

මම බොරුවක් කිව්වේ කියලා දැනගෙන මෙන්න මූ මගෙන් අහනවා පයන්නට යටින් කයන්නක් තිබ්බේ නැද්ද කියලා.මන් තනි තැන කුජීත වුනා.මට පයන්නයි කයන්නයි කපාගෙන මැරෙන්න හිතුනා ලැජ්ජාවට.මම ඊට වඩා මුකුත් කිව්වේ නැහැ.අංකල් කාරයා හෙන කින්ඩි හිනාවක් දැම්මා.

දවස් දෙක තුනකට පස්සේ ළඟ ගේක බන ගෙයක් තිබ්බා.බන ගෙදර වැඩ කටයුතු කරලා බන පටන් ගත්තට පස්සේ කොල්ලෝ ටික බුලත් විට හප හප කට්ටියම වාඩි වෙලා හිටියා.එවෙලේ මාතෘකාව වුනේ බණ කියන්න ආපු හාමුදුරුවෝ සර්ප වෙදකම් කරනවා කියලා.ඔය අස්සේ අර අංකල් කාරයත් පැත්තකින් වාඩි වෙලා අතර මැද්දට හොම්බ දාලා මාව කුජීත කරන්න අර පයනු කයනු සීන් එක කිව්වා.එවෙලේ කට්ටියම මට හිනා වුනා

මට ආයෙත් කුජීත ගතියක් දැනුණා.එත් මගේ තියෙන කුප්ප ගතිය එවෙලේ මතු වෙලා කට්ටියම ඉස්සරහ මම අංකල්ට කිව්වා
ඔව් අංකල් ඒ නයාගේ පයන්නට යටින් කයන්නකුත් තිබ්බා අංකල්ට නැති වුනාට කියලා.කට්ටියම මහා හඬින්  හිනා වුනා.අංකල් ක්ෂෙනික නැගිටලා යන්න ගියා.