105 නෝනාගේ දුවට ලව් කරපු ගාමිණි අයියා

දැකලා තියෙනවද යකඩ බඩු එකතු කරන්න එන දාඩිය දාගෙන අව්වට පිච්චිලා කළු වෙලා කරත්ත තල්ලු කරන් එන මිනිස්සුන්ව?.ගාමිණි අයියාත් එහෙම කෙනෙක් එයා දැනට අවුරුදු විස්සකට උඩදී නුවර පැත්තේ දුර ගමක ඉඳලා මෙහෙ ඇවිත් යකඩ එකතු කරන රස්සාව කරන්න අරන් තියෙන්නේ ගෙදර ආර්ථික ප්‍රශ්න නිසා හරියට ඉගෙනගෙන රස්සාවක් කරන්න බැරි වුන නිසා.


එත් මිනිහා හරිම උත්සාහ වන්තයි ඒකනේ නන්නාදුනන කොළඹට ඇවිත් ඒ වගේ රස්සාවක් කරන්නේ.මිනිහගේ පෙනුම අතින් වුනත් ගත්තාම ගොඩක් කලුයි ඇන්දෙත් කිලිටි වුන ඉරුණු ඇඳුම්.මෙයාගේ පෙනුම ද්‍රවිඩ ජාතිකයෙක් වගේ.ඔය රස්සාව කරන්නෙත් ගොඩක් ද්‍රවිඩයන් නිසා මෙයාව ඉස්සෙල්ලාම දකින හැම කෙනෙක්ම හිතුවේ මෙයත් ද්‍රවිඩයෙක් කියලා.

ඒ වගේම තමා ගාමිණි අයියා දැනට වුනත් හරිම කඩිසර මනුස්සයා ඉස්සරත් හොඳට හයිය හත්තිය තිබිලා තියෙනවා කොල්ලා කාලේ.ඔය යකඩ බඩු එකතු කරන්න යද්දී මිනිහා එක්ක එක ගේක නෝනා කෙනෙක් හිතවත් වෙලා තියෙනවා මේ නෝනා ගාමිණි අයියට අයින් කරන යකඩ කෑලි,බෝතල් වගේ ඒවා නිකනුත් දීලා.ගාමිණි අයියත් ඔය හරියෙන් යද්දී ඔය ගෙදරට ගිහින් පොල් ලෙලි ගහලා දර පලලා දීලා වගේ වැඩ කරලා කීය කීය හරි හොයාගන්නවා.

මේ ගෙදර නෝනාට ඉඳලා තියෙනවා දුවෙක් ගාමිණි අයියා මට කියපු විදියට ඒ දුව ඇහැට කනට පේන ඇත්තියක්.අනික හරි විසේකාර තරුණියක් පෑ විසේ කම් වලටයි හුරතල් කමටයි ගාමිණි අයියාට මේ කෙල්ලට හිත ගියා.ගෙදර නෝනා වගේම නෝනාගේ දුවත් ගාමිණි අයියට හරියට අනුකම්පා කරා අඳින්න ඇඳුම් දුන්නා.මේ අනුකම්පාව වැරදියට තේරුම් ගත්ත ගාමිණි අයියා හිතුවේ නෝනාගේ දුවත් ගාමිණි අයියාට කැමැත්තෙන් ඉන්නවා ඇති කියලා.

කොහොමින් කොහොමින් හරි දවසක් නෝනා පේන්න නැති වෙලේ ගාමිණි අයියා අර ඇත්තිගෙන් අහලා තියෙනවා බඳින්න කැමතිද කියලා.ඒ වෙලේ අර ඇත්තිත් මහා හයියෙන් හිනා වෙලා ගාමිණි අයියව කුජීතම කරලා දාලා.ඒ විතරක් නෙවේ ගාමිණි අයියට කියලා "ඔයා දෙමල කෙනෙක් වගේනේ මන් වගේ ලස්සන කෙනෙක්ට ඔයා වගේ දෙමළෙක් හරියන්නේ නැහැ ගාමිණි" කියලා.

ඒ වදන් වලින් හිත රිදිලා ගාමිණි අයියා කරත්තෙත් තල්ලු කරන් එතනින් ගිහින් තියෙන්නේ සිද්ද වුනු දෙයින් හිත රිදිලා විතරක් නිසාම නෙවේ ලැජ්ජාව නිසාත්.පස්සේ ගාමිණි අයියා ඔය ගේ පැත්ත පළාතේ ගිහින් නැහැ.ඒත් පොර රස්සාව උපරිමේටම කරගෙන ගියා ටික දවසකින් යකඩ බඩු එකතු කරන කඩයක්ම දාගෙන.තවත් අවුරුදු පහ හයකට පස්සේ ගැලපෙන ගෑනු කෙනෙක්වත් හොයාගෙන කසාදයකුත් බැන්දා.

ඔය ඔක්කොම දේවල් වෙලා තව අවුරුදු 15ක් විතර ගත වුනා.දැන් ගාමිණි අයියගේ දුවලා දෙන්නම ඉගෙන ගන්නේ OKI ජාත්‍යන්තර පාසලේ.තට්ටු දෙකේ සුපිරි ගෙවල් දෙකක් තියෙනවා එකක් තාම හදනවා.යකඩ  බඩු කඩේ දැන් කොල්ලෝ විස්සක් විතර වැඩ.ගාමිණි අයියා කඩේට නම් වැඩිය එන්නේ නැහැ.

ඒ වුනාට තාම ගාමිණි අයියා යන්නේ නයින්ටියේ කොයි වෙලේ බැලුවත් බුලත් හපේ කටේ.බුලත් විතරක්ම නෙවේ කටේ තියෙන්නේ කාව දැක්කත් ලෝබ නැතුව පෙන්වන බුලත් කහට බැඳුනු දත් පෙන්වන හිනාවකුත් තියෙනවා.හරිම නිරහංකාර චරිතයක්,දන්සලක් එහෙම තියෙනවා ආධාරයක් දෙනවද ඇහුවොත් දන්සලට කලින් දවසේ එයාගේම ලොරියකින් හාල් මිටි දෙකක් ගෙනල්ලා බාලා මදි වෙන දේවල් ගන්න රුපියල් දෙදාහක් තුන්දාහක් දීලා යනවා.

මේ වගේ චරිතයක් සමහර විට සුලබ ඇති ඒත් මේ වගේ රත්තරන් මනුස්සයෙක් ගැන සටහනක් තැබුවේ නැත්තම් මම හරි ආත්මාර්ථකාමී චරිතයක් වෙනවා.